პარლამენტმა გენდერულ კვოტებს მხარი უნდა დაუჭიროს

სამოქალაქო საზოგადოების ოაგანიზაციები განცხადებას ავრცელებენ:

 

"სამოქალაქო საზოგადოების ორგანიზაციები მოვუწოდებთ საქართველოს პარლამენტს პლენარულ განხილვაზე მხარი დაუჭიროს 37,455 ამომრჩევლის ხელმოწერით წარდგენილ საკანონმდებლო ინიციატივას, რომლის მიზანიც ქალთა და მამაკაცთა შორის თანასწორი პოლიტიკური წარმომადგენლობის უზრუნველყოფის ხელშეწყობაა. 



2017 წლის 12 ივნისს, 37,455-მა ამომრჩეველმა საქართველოს პარლამენტს საკანონმდებლო ინიციატივით მიმართა, რომელიც საპარლამენტო და ადგილობრივი თვითმმართველობის არჩევნებზე, პარტიებსა და ბლოკებს დაავალდებულებს, რომ პარტიული სიებში ყოველი მეორე განსხვავებული სქესის კანდიდატი წარადგინონ. ასევე, კანონპროექტის მიხედვით, პარლამენტის ან საკრებულოს პროპორციული წესით არჩეული წევრისთვის სადეპუტატო მანდატის ვადამდე შეწყვეტის შემთხვევაში, მის ადგილს დაიკავებს სიაში რიგით მომდევნო იმავე სქესის წარმომადგენელი. შემოთავაზებული მოდელი გენდერული კვოტირების დროებითი სპეციალური ღონისძიების ერთ-ერთ სახეს წარმოადგენს. საკანონმდებლო ინიციატივის მიღების შემთხვევაში 2020 წლის მოწვევის პარლამენტში ქალთა რაოდენობა იქნება მინიმუმ 26%. 


საქართველოში მოსახლეობის 52.3% ქალია, თუმცა არჩევით თანამდებობებზე ქალების წარმომადგენლობა შეუსაბამოდ დაბალია. ბოლო საპარლამენტო არჩევნების შედეგად, ქალებმა მანდატების მხოლოდ 16% მოიპოვეს, ხოლო საკრებულოებში არჩეული დეპუტატების 13.46%-ია ქალი. ამ მაჩვენებლებით, საქართველო ქალთა პოლიტიკური წარმომადგენლობის კუთხით განვითარებულ ქვეყნებს მნიშვნელოვნად ჩამორჩება. მიუხედავად უკანასკნელ წლებში არჩეულ ქალთა რაოდენობის მცირე ზრდისა, არსებული ტემპებით საკანონმდებლო და ადგილობრივი თვითმმართველობის ორგანოებში გენდერული დისბალანსის აღმოფხვრას ათეული წლები დასჭირდება.


გამოცდილება აჩვენებს, რომ ქალებს არჩევნებში კანდიდატებად დასახელებისათვის მნიშვნელოვანი საზოგადოებრივი, სოციალური და ეკონომიკური ბარიერების გადალახვა უწევთ. ქალთა წარმომადგენლობას ხელს არ უწყობს საქართველოში დღეს არსებული შერეული საარჩევნო სისტემაც. 


არსებული ბარიერების დაძლევა თანასწორობის უზრუნველსაყოფად ქმედითი ზომების გატარებას მოითხოვს. პროპორციულ საარჩევნო სიებში გენდერული კვოტირება, სწორედ საკანონმდებლო, დროებით ზომას წარმოადგენს ქალთა და მამაკაცთა პოლიტიკაში თანასწორი მონაწილეობის უზრუნველსაყოფად. გამოკითხვების მიხედვით, საქართველოს მოსახლეობის უმრავლესობა მიიჩნევს, რომ ქალების რაოდენობა პარლამენტსა და თვითმმართველობის ორგანოებში ძალიან ცოტაა და მხარს უჭერს სავალდებულო გენდერული კვოტების შემოღებას, რაც 37 ათასზე მეტი ამომრჩევლის ხელმოწერითაც დასტურდება.  


საქართველოს სახელმწიფომ 2017 წელს კონსტიტუციაში შეტანილი ცვლილებებით, ქალთა და მამაკაცთა შორის უთანასწორობის აღმოფხვრისა და არსებითი თანასწორობის უზრუნველყოფის, მათ შორის განსაკუთრებული ზომების გატარების, ვალდებულება, აიღო. გენდერული თანასწორობის უზრუნველყოფის ვალდებულება არაერთი საერთაშორისო ხელშეკრულებიდან გამომდინარეობს, მათ შორის „ქალთა დისკრიმინაციის ყველა ფორმის აღმოფხვრის შესახებ“ (CEDAW) კონვენციიდან. კონვენციის ფარგელებში არსებული კომიტეტის რეკომენდაციაში, რომელიც საქართველოს მიერ ქალთა უფლებრივი მდგომარეობის შესახებ პერიოდული ანგარიშების წარდგენის შემდეგ შემუშავდა აღნიშნულია, რომ საქართველოს ქმედითი ნაბიჯები უნდა გადადგას გენდერული თანასწორობის განსამტკიცებლად, მათ შორის მიიღოს სავალდებულო ზომები ქალთა ჩართულობის გაზრდისთვის. გარდა ამისა, ევროკავშირთან ასოცირების განახლებული დღის წესრიგი 2017-2020 შეიცავს ახალ ვალდებულებას საქართველოსთვის, გადადგას აქტიური ნაბიჯები პოლიტიკურ ცხოვრებასა და გადაწყვეტილებების მიღების პროცესში ქალთა წარმომადგენლობის გასაზრდელად. 


აღნიშნული კანონპროექტი პარლამენტს აძლევს ისტორიულ შანსს, ხელი შეუწყოს ქალთა პოლიტიკური მონაწილეობის ზრდას. მისასალმებელია, რომ საკომიტეტო განხილვის ეტაპზე, კანონპროექტს მხარი უკვე დაუჭირეს იურიდიულ საკითხთა, ადამიანის უფლებათა დაცვისა და რეგიონული განვითარების კომიტეტებმა. 


მოვუწოდებთ პარლამენტს დროულად განიხილოს საკანონმდებლო ინიციატივა პლენარულ სხდომაზე. უმნიშვნელოვანესია, ხელისუფლებამ და ოპოზიციურმა პარტიებმა გამოავლინონ ქალთა და მამაკაცთა შორის თანასწორობის მკაფიო პოლიტიკური ნება და დაუჭირონ მხარი საქართველოს მოქალაქეთა საკანონმდებლო ინიციატივას,"–ნათქვამია განცხადებაში.




მსგავსი სიახლეები
"დადასტურდა ერთგულება იმ გადაწყვეტილების მიმართ, რომ საქართველო გახდება ნატო-ს წევრი ქვეყანა"
ირაკლი ღარიბაშვილმა "ქართული ოცნების" დეპუტატობისა და მერობის კანდიდატები დაასახელა
მამუკა ბახტაძემ და იენს სტოლტენბერგმა ევროატლანტიკური ინტეგრაციის გზაზე საქართველოს მიერ მიღწეული პროგრესი განიხილეს
„ბატონი შალვა შავგულიძე ეთანხმება “ევროპულ საქართველოს”, რომ ვანო მერაბიშვილი პოლიტპატიმარია და გირგვლიანის საქმეზე ტყუილად აქვს მისჯილი?”
„დეპრესია დამემართა იმის გამო, რომ ქვეყანაში არის კანალიზაცია ჩვეულებრივი“ - გაბრაზებული ნიკა გვარამიას ვიდეო-სელფი
„სააკაშვილის ვითომ ჩამოსვლის მოლოდინი უკვე უსაქმურობის გამამართლებელ საბუთად არავისგან მიიღება“
საქართველოს პრემიერ-მინისტრმა მამუკა ბახტაძემ ნატო-ს გენერალურ მდივანს სამუშაო ვახშამზე უმასპინძლა
საქართველოს მოქალაქეები ტაილანდის ვიზის აღებას საზღვარზე 14 აპრილიდან შეძლებენ
`როგორც იქნა მიხვდნენ, რომ მიხეილ სააკაშვილი მათი ყველაზე დიდი ნეგატივია საერთაშორისო მასშტაბით, მაგრამ ამასთანავე, ყველაზე დიდი დანაკარგი მათი მხარდამჭერებისთვის ქვეყანაში~
"ქემალისტები ყარსის მოლაპარაკებაზე აგრესიულად იქცეოდნენ - იოტისოდენაც არ დაუთმეს საბჭოთა საქართველოს, რომელიც საზღვრის სოფელ სარფის მიღმა გადაწევას ითხოვდა"
“ნაცმოძრაობას” ქ-ნი სანდრას კანდიდატურაზე საბოლოო გადაწყვეტილება არ მიუღია“
ნატო-ს გენერალური მდივანი იენს სტოლტენბერგი უკვე თბილისშია
„სად არიან "გულმხურვალე" ზვიადისტები დოდონა კიზირია, ეკა ხერხეულიძე და სხვანი - ზუგდიდი თუ ერთი მეგრულად წამღერებაში გაცვლის ბატონი ზვიადის ხსოვნას, შეურაცხყოფს მას“
„პარტიას სჭირდება ახალი ძალა, ბევრი ახალი ადამიანი, ბევრი ახალი და საზოგადოებისთვის საინტერესო პროექტი“
„2012 წელს რომ არ მომხდარიყო ეს კატასტროფა, საქართველო იქნებოდა მინიმუმ, აღმოსავლეთ ევროპაში განათლების მთავარი კერა, საქართველო იქნებოდა ინფრასტრუქტურულად ბევრად უფრო წინ“
„ერთიანი ნაციონალური მოძრაობის“ თავმჯდომარედ გრიგოლ ვაშაძე აირჩიეს
ხვალ საქართველოს ნატო-ს გენერალური მდივანი იენს სტოლტენბერგი ეწვევა
"ოლიგარქები აღმოსავლეთ ევროპაში დემოკრატიის ნარჩენებსაც კი ანადგურებენ" - «The Washington Post»-ში გამოქვეყნდა სტატია, რომლის ავტორი საქართველოს ექსპრეზიდენტი მიხეილ სააკაშვილია
“მაჩალიკაშვილის საქმეზე მე ვერაფერს გეტყვით - ეს გადის ჩემი უფლებამოსილების ფარგლებიდან და არ დავივიწყოთ, რომ საქმე ტერორიზმს ეხება“
გაეროს ადამიანის უფლებათა საბჭომ საქართველოს ოკუპირებული ტერიტორიების შესახებ რეზოლუცია - „თანამშრომლობა საქართველოსთან“ - მიიღო